អ្នកភូមិបូរីកីឡាតវ៉ាបិទផ្លូវទាមទារដំណោះស្រាយ

 ភ្នំពេញ៖ អ្នកភូមិបូរីកីឡាប្រមាណ ១០០នាក់ បិទផ្លូវលេខ ២១១ ក្នុងសង្កាត់វាលវង់ខណ្ឌ ៧ មករា នៅព្រឹកថ្ងៃច័ន្ទ ទី ២៧ ខែកុម្ភៈ ឆ្នាំ ២០១២ ដើម្បីទាមទារ អោយ ក្រុម ហ៊ុន ផានអ៊ីម៉ិច (Phanimex) សង់អាគារអោយគ្រប់ចំនួនទៅតាមកិច្ចសន្យាជាមួយប្រជាពលរដ្ឋ ។ 

ជាថ្មីម្តងទៀតអ្នកភូមិបូរីកីឡា ដែលនៅសេសសល់បានជួបប្រជុំគ្នានៅខាងមុខអាគារទី៨ ក្នុងប្លុក​បូរីកីឡា សង្កាត់វាលវង់ខណ្ឌ ៧ មករា។ ពួកគេមាន​កាន់​បដា និងព្រះឆាយាលក្ខណ៍ ព្រះមហាក្សត្រ ព្រះមហាវីរៈក្សត្រ និងអគ្គមហេសី និង រូបថត លោក នាយករដ្ឋមន្រ្តី ហ៊ុន សែន និងភរិយា ដោយ​ទទូច​អោយ​ក្រុមហ៊ុនត្រូវផ្តល់ផ្ទះទះអោយពួកគេទៅតាមកិច្ចសន្យា នៃការអភិវឌ្ឍន៍​នៅហ្នឹងកន្លែង។

ពួកគេបានលើកគ្នាទៅតវ៉ានៅលើ ផ្លូវលេខ ២១១ ជាប់ខាងលិចប្លុកបូរីកីឡា អស់រយៈពេល​ជាង​១ម៉ោង។

ពួកគេបានលើកបង្ហាញឯកសារសំគាល់ការ​ស្នាក់​​នៅរបស់ពួកគេក្នុងតំបន់បូរីកីឡា។ ពួក​គេបញ្ជាក់ថា ពួកគេជាង១០០គ្រួសារមានឯកសារដែលបានអង្កេតរួចកាលពីឆ្នាំ២០០៣។
ការ​អះ​​អាង​របស់អ្នកភូមិបូរីកីឡាជាប្រតិកម្មតបនឹងលិខិតរបស់អភិបាលរាជធានីភ្នំពេញ លោក កែប ជុតិមា។ នៅក្នុងលិខិតចុះពីថ្ងៃទី២១ ខែកុម្ភៈ ឆ្នាំ ២០១២ លោក កែប ជុតិមា បញ្ជាក់ថា អ្នកភូមិ​បូរីកី​ឡា​ភាគច្រើនបានទទួលសំណងពីក្រុមហ៊ុនហើយ នៅសល់ ៣៥គ្រួសារ កំពុងសម្រប​សម្រួល​អោយ​ទទួលបានផ្ទះ។

ចំណែកអ្នកភូមិផ្សេងទៀតគឺពុំមានឯកសារត្រឹមត្រូវ អ្នកទាំងនោះជា អ្នកខិលខូចយក​ផ្ទះពីរដ្ឋទៅ​លក់ រួចចាប់ផ្ទះថ្មី ឬបំបែកគ្រួសារ និងលក់ផ្ទះហើយ​មិន​ព្រមចាកចេញពីតំបន់បូរីកីឡា។ដោយ​សំអាងថាមាន ឯកសារត្រឹមត្រូវអ្នកភូមិបូរីកីឡា ដែលអង្គុយ កណ្តាលផ្លូវបាន​ទាមទារបអោយ​ប្រធាន​ក្រុមហ៊ុន ផានអ៊ីម៉ិច អ្នកស្រី ស៊ុយ សុផាន ផ្តល់ដំណោះស្រាយដូចមានចែងក្នុងកិច្ចសន្យា។

ក្រៅពីអ្នកភូមិដែលមានវ័យចំណាស់ នៅក្នុងការតវ៉ានោះគេក៏ឃើញ​មានកុមារប្រមាណ​ជិត១០នាក់​បានទៅតាម។ ពួកគេបានកាន់បដា និងរូបថតលោក នាយករដ្ឋមន្រ្តី ហ៊ុន សែន។

កុមារី វ៉ាន់ ស្រីលីស អាយុ ៨ ឆ្នាំ បាននិយាយថា គ្រួសាររបស់គេជួបការលំបាកកាន់តែខ្លាំងនៅ​ក្រោយ​ពេលផ្ទះសម្បែងត្រូវឈូសឆាយបំផ្លាញ។ ដោយ​សារជីវភាពគ្រួសារដុនដាបស្រីលីស មិនបានទៅរៀនជិតមួយឆ្នាំហើយ។ នៅពេលនេះគេអំពាវនាវអោយអាជ្ញាធរពាក់ព័ន្ធ ផ្តល់ដំណោះ​ស្រាយអោយ​បានឆាប់។

អ្នកភូមិដែលតវ៉ា ក៏បានទាមទារអោយក្រុមហ៊ុនផានអ៊ីម៉ិច ផ្អាកការសាងសង់អាគារ ទី៩ និងទី១០ ហើយងាកមកផ្តល់ដំណោះស្រាយដល់ពលរដ្ឋ។

ប្រធាន​ក្រុមហ៊ុន ផានអ៊ីម៉ិចអ្នកស្រី ស៊ុយ សុផាន មានប្រសាសន៍តាមទូរស័ព្ទថា ប្រសិន​បើពល​រដ្ឋ​មានឯកសារត្រឹមត្រូវក្រុមហ៊ុន នៅតែមាន​គោលនយោ​បាយផ្តល់ផ្ទះសម្រាប់ពួកគេ។

អ្នកភូមិបូរីកីឡា បានបញ្ចប់ការតវ៉ាដោយបិទផ្លូវលេខ ២១១ នៅពេលថ្ងៃត្រង់ ថ្ងៃច័ន្ទ ទី ២៧ ខែកុម្ភៈ ដោយពុំបានទួលបានដំណោះស្រាយ។ ពួកគេ​បញ្ជាក់​ថា នឹងបន្តការតវ៉ា នៅថ្ងៃបន្តបន្ទាប់ទៀត រហូតទទួលបានដំណោះស្រាយ